Sep 9, 2007

شعور بالملل



أول جملة بديت أكتبها اليوم اكتشفت إنها باللغة العربية الفصحى
هذا يعكس شغفي للغة العربية الفصحى
يمكن لأن أول ما بديت أعبر كان في حصة التعبير - مادة اللغة العربية
التعبير شي جميل ... من اسمه
وأتذكر مدرسة العربي أبلة (...؟) .. عطيات يمكن نسيت اسمها ,
كانت دووم تشجعني و تقول : عبري عن نفسك يا حببتي و حلـكي (=حلقي) بخيالكي
أحب اكتب بالعربي
.................

تمر الأيام .. مملة ربما في بعض الأحيان .. وفي احيان أخرى مؤلمة, متحدية
وفي معظمهـا رتيبة مع قليل من الملل وكثير من الإرهــــــــاق
ولكنها بمجملها أيـــام مفعمة بعبق أتخمني مرارة
إنه بلا منازع : عبق الغربة
- تعبير مجازي المقصود فيه: إن الغربة خنقتني -

.................

شنو صار اليوم .. اليوم الأحد بديت يومي برشف فتجان الشاي (ما أحب القهوة من أيام الي كنت أزقها زق وأنا سهرانه أسوي أسايمنت الجامعة .. من خلصت و تخرجت ( بعد الماجستير) بديت أفكر جديا إن عادة شرب القهوة مضرة بالصحة .. وببساطة تركتها

وانتقلت للشاي الأخضر ... مر لكنه مفيد و قمت أحب مرارته خصوصا إذا كان شاي أخضر بورد الياسمين .. هذا النوع غرامي لأنه ريحته ياسمين .. و طعمه عجيب .. وفوق هذا مفيد
so

في جرائد اليوم البريطانية
شدت انتباهي شغلة بعيدة عن الملل .... شوفوا هالخبر
The Conservatives are to propose banning plasma screens and other energy-guzzling electrical goods. The plans will target white goods like fridges and freezers, as well as TVs, personal computers and DVD players that use too much energy or operate on stand-by.The ideas come from a group set up by David Cameron to develop policies to protect the environment.

يالله زين .. كل شي صار في دائرة قوانين المنع في بريطانيا ..
وناقص يمنعون هالشغلات !!1
وتقولون الكويت ما فيها حريات
يحليلهم الانجليز .. ماشين بالقانون عدل
بس مو أي قانون .. أكثر شي القوانين الي تدرعليهم أرباح
ماديين بالسليقة

اوك ... جرايد عربية بطلت .. ما قمت اقراها أبدا .. حسيت فوق الغربة تسبب لي إحباط وحزن و اكتئاب ..
خصوصا ذاك اليوم خبر غريب عن عمليات التجميل في الكويت وأنواعها ...
و .... بدون تعليق




هذا خبر يثير التساؤل و الاشمئزاز ..
for God's sake

شنو هذا الي قاعد يصير .يمكن فيه ناس يحتاجون هالامور بسبب عيب خلقي مثلا أو طفرات جينية وراثية ..
ولكن السالفه صارت خارج منطقة التغطية ... ترى المبالغة شينة ما هي زينة
تحسسني إن كل شيء بهالحياة مصطنع و خادع :)


على طاري المود .. إحنا الي نختار الموود
أنا اخترت الملل يمكن لأن الملل مباح ;) ... على الأقل في قاموسي الشخصي
وترى الملل عندي و غيرها من المزاجات الأخرى تختلف اختلافا تااما عن مصطلحات الغير
وما أعتقد انه فيه إنسان ممكن يشبهني في تعريفاتي للمصطلحات اليومية
اليوم بحاول أعرف لكم الملل
الملل بالنسبة لي هو : حياة بلا مغامرات
ولكن مو أي نوع من المغامرات ..
أنما النوع إلي يعتبره البعض ممل
و اعتبره أنا تحدي و إثارة :)

طبعا هذا جزء من التعريف

دمتــــــــم بـــــــــــود

.................


5 comments:

SolaimaN said...

اشوه ثاني مره محد يسبقني

:)

مساءالخير والتباشير انشالله

اذكر اني درست مقرر انجليزي عن البيئه وكان عدد وحداته
16

بالبدايه فعلا حسيته شي ممل ومعلوماته
اتكلم عن تفاصيل

وصطلحات جدا سخيفه ،،بس والله ما اتخيلين شلون حبيت

هالتفاصيل مع الوقت ،،على كثر ما كانت المراجع دسمه

وكبيره ،، ما كنت متخيل نفسي اني افتح النت علشان

ابحث عن معلومات اضافيه لي ولاشباع ثقافه معينه

مادري يمكن ليش اني احب استكشف الاشياء اليديده

والا انا بعد مليق مثل ما شفتي هالخبر بالجريده

:S

تعريفج للملل دودهني ،، وخلاني ماني عارف احط

تصور عن شخصيتج ،،يعني انتي ذكرتي مثلا ان غياب

المغامرات الجديده شي ممل وانا احسه فعلا تعريف

منطقي ،، بس لما قلتي ان المل بالنسبه لج شي بحد ذاته

تحدي ومغامره ،،ياني احساس اني انتف شعري

:P

صج انا اللي مادري شقول !!؟

:)

ولا تحرمينا من هالبوستات

واذا لقيتي شي عن عمليات التجميل للرجال علميني

تكفين ،، انا يمكن يبيلي تسع عمليات

;)

اوروفوار

Angelic said...

أهلين

SolaimaN

شكرا على مرورك الي أعتز فيه
بتكون أول معلق :) لان مثل ما تشوف ما فيه وايد ناس يعلقون

الظاهر انت فهمت الجملة غلط .. ترى عدلت البوست عشان توصل الفكرة:1


الملل بالنسبة لي هو : حياة بلا مغامرات
ولكن مو أي نوع من المغامرات .. أنما النوع إلي يعتبره أغلب الناس ممل
و اعتبره انا تحدي و إثارة :)


على طاري العمليات .. ترى الخبر موجود عالسايت فيه لستة عمليات الرجال .. بس مجرد سؤال : أنت من النوع الي يرضون يعرضون نفسهم لمشرط الجراح بس لمجرد أرضاء الناس ؟؟

عساهم ما رضوا ولا عجبهم بالطقاق ... المهم جمال الروح.. وبعدين أذكرك بالمثل الي يقول : الريال شايل عيبه
بغض النظر عن تحفظاتي على هالمثل وغيره من الأمثال المشابهة

في اعتقادك لازم الرجل يكون متصف بالجمال ؟؟ مثل مقاييس المرأة
للجمال

هذا موضوع بحد ذاته يبيله بوست بروحه

اشكر لك تواصلك و دمت بود وبلا ملل


:)

SolaimaN said...

انا انشالله برد اعلق بعدين ،،بس حبيت اقول

مبارك عليج الشهر

:)

SolaimaN said...

باك

:)

اول شي عرفتي تختارين الصوره اللي تمشي مع الروح اليديده


:)

وبعدين ،، انا لو اتوقع انه ثلاث او اربع عميات

ممكن تعدل من خشتي شوي جان سويتها بس انا ماتكفيني

حتى عشرين عمليه !!!!!!1

:P

no no no ,,, just kidding ange.

:)

انا ما اعتقد ان من يبحث عن الحب الحقيقي يبحث

عن الجمال بالشكل الخارجي او الاناقه او حتى طريقه

التصرف الذربه او المتكلفه والمتصنعه احيانا

الجمال الباقي والجمال الحقيقي هو جمال الروح بلا منازع

جمال الفكر ،وجمال العطاء ومبادله الود بالود

وليس الزخرف الخارجي او المظهر ، فالننظر الى

عالمنا الواقعي ، وعالم الوسط الفني على سبيل المثال

المليء بالجميلات الفاتنات من النساء ،والوسيمين الفاتنين من الرجال

اين هم بعلاقاتهم وزيجاتهم من السعاده؟

كم استمرت اغلب هذه الزيجات في اقصى حالاتها؟

ماكو شي


:s

ودمتي يا سيدتي جميلة منظر ومخبر

:)

واسف على التـأخير

Angelic said...

SolaimaN أخي

ولكم باك :)

شكرا لـ مرورك الكريم

وعلى ابدائك الراي في مدونتي المهجورة و المتواضعه

;)


بالنسبة للعمليات
في اعتقادي تحتاجها أرواحنا قبل كل شيء في عالم اليوم و بشكل طاريء وسريع

فيه واحد فكر شلون شكله من الداخل يمكن يكون شكل مرعب و مقزز بسبة تراكمات البشاعة النفسية على أرواحنا

الاجدر بنا أن ننبش في مكنونات الروح و نجملها .. أكثر و أكثر و أكثر


أما عن الحب , فنحن لا نبحث عنه .. و إنما يفاجئنا على حين غرة ومن غير سابق إنذار

بل يصطادنا :) دونما نشعر


جميلات الفن :) هذا في زمان ولى وفات .. الحين الجمال مصطنع ( يفش من اول استعمال )

ودمت سيدي بجمال منظر ومخبر


وكل عام و أنت بألف خير



عساك من عــــــواده

:)